චිරි චිරි සද්දෙන් කැරකෙන
විදුලි පංකාව
නැහැය විනිවිදයන
බෙහෙත් ගඳ අස්සේ
බිංදුවෙන් බිංදුව වැක්කෙරෙන
සේලයින් බෝතලෙන්
වැටෙනවානම් එකම එක බිඳුවක්
බලාපොරොත්තුවක් දිය කරලා
ඉහ ඉද්දර හැමෝම එකතුවෙලා
හිත හැදෙන කතා දහසක් කියද්දී
නුඹ නැති අඩුව නෙත් සොයනවා
දොරටුව ළඟ
අත වනන මරණය
පණ ගැහෙන හදවතට
සමුගන්න බෑ දැන්ම
එනවැති ඔහු ළඟ ළඟම
ඉසිඹුවක් අරගන්න අර අදින ජීවිතය
නවතින්න කලියෙන්
එකම එක පාරක් ඇවිත් යනවද
හිනා මලක් අරන්
මට තියෙනවා කියන්න එකම එක දෙයක්